Member-only story
設計師只聽從指令的後果
大學嘅時候，有一個大學教授差唔多成個學期都喺度同我地講design is about storytelling。嗰時我哋成班同學都覺得，你快啲教多啲design skill好過啦，唔好喺度講廢話。
但係隨着社會經驗越來越多，加上工作的日子越來越長就知道佢講嘅係金石良言。
點解？因為好多時我哋作為設計師太主觀，係好多情況之下，我哋缺乏左同理心，會假設左我哋嘅客人/設計經理/上司，都係我哋嘅角度睇嘢，導致好多時候我哋覺得自己個設計好好，但係答唔到對方嘅期望。好多時候就係我哋身為設計師解釋得不足而導致呢個困局所出現的。係呢個情況之下，要解決問題，就係要學識storytelling。
咩係storytelling？
就係係你展示設計嘅時候，除咗展示最後嘅唔知用咗幾多個鐘頭設計嘅圖之外，仲要顯示埋成個設計過程的前文後理(Context)，點樣有個概念去到最後展示比客人嘅最後設計。
點解要咁做？
第一，佢幫助你嘅客人更加了解你嘅設計，因為你幫咗佢由淺入深咁進入咗你設計作品時嘅世界，令佢可以係同你同一個角度之下去睇你嘅作品
第二，Storytelling幫助你提升作品嘅價值以及你個人作為一個設計師嘅價值。因為好多時客人都以為佢都可以做到你嘅作品，只係因為唔識用個軟件，又無你咁熟手，所以先做唔到姐。但係佢哋唔知道我哋嘅熟手同埋最後完成嘅作品，背後係需要幾多嘅經年浸淫先可以做出黎嘅，佢唔知我哋點解要咁樣設計而唔係咁樣設計，只係知道靚定唔靚。所以就係要透過講一個設計故事除咗解釋設計之外仲要去證明我哋係通過我哋專業嘅經驗去做判斷先可以達到最後嘅依一個設計的。
第三，假如我哋唔識講故事嘅話，直接將作品交俾客人嘅話，我哋同做咗佢支畫筆有咩分別呢？佢比idea，我哋用筆/電腦去畫出嚟，過程中係冇設計成份嘅，設想？計劃？依個就係啲人成日覺得設計只係值幾百蚊嘅原因，佢哋覺得俾既係軟件操作費而唔係設計費。
第四，storytelling會幫助建立你嘅商業價值。其實設計師同sales有部份工作都係大同小異，就係要識得推銷，一件物品平平無奇咁放喺枱面可能只係值一蚊，但係如果你好完整咁講多一個故事點樣由冇都有，依件物品最後可能可以以十紋賣出。而當你有能力將產品價值翻倍嘅時候，你個人就會變得越值錢，你嘅收入亦都會因應增加。我夠膽講如果你做到咁嘅時候，你老闆都唔夠膽得罪你。
如果你哋都有過身同感受嘅經驗嘅話，不妨都留言同大家分享下你哋嘅親身經歷啊，話唔定都可以幫到大家下次叫價叫得更高，唔再用賤價接創意工作。
鍾意依篇文章嘅請你俾個拍掌我呀，多謝！
